In die oop velde van Malawi, onder die warm son van Afrika, het ’n geskiedenis ontvou wat diep spore in die harte van die gemeenskappe agtergelaat het. Die Church of Central Africa Presbyterian (CCAP), wat 100 jaar gelede gevorm is, het gegroei tot ’n magtige pilaar van geloof en hoop en het duisende lewens onherroeplik verander. Hierdie jaar, in Augustus, het die CCAP hul eeufees gevier – ’n tyd van terugkyk, dankbaarheid en hoop vir die toekoms.
Die CCAP is nie net ’n kerk nie; hulle is ’n lewende monument van God se werk deur mense wat geroepe is om te dien. Wat in 1924 begin het as die versmelting van twee sinodes, het gegroei tot vyf sinodes wat vandag oor Malawi, Zimbabwe en Zambië strek. Die NG Kerk se werksaamhede het reeds in 1889 onder leiding van A.C. Murray in Malawi begin en in 1926 het die Nkhomo Sinode, ’n produk van hierdie sendingwerk, by die CCAP aangesluit.
Hierdie viering is nie net ’n viering van die kerk se ontstaan nie, maar van die Here se teenwoordigheid oor ’n eeu van genade. Psalm 126:3, “Die Here het iets groots aan ons gedoen. Ons was verheug,” was die ankervers van die fees en dit is duidelik dat die Here nog steeds groot dinge vir en deur die CCAP doen.
‘n Getuienis van ’n groeiende kerk
“Die CCAP was ’n belangrike vennoot in ons nasie se reis,” het President Lazarus Chakwera van Malawi gesê tydens die dankdiens op 25 Augustus in Lilongwe. Sy woorde, gekombineer met die teenwoordigheid van ander leiers, soos Zimbabwe se Vise-President Kembo Mohadi en Malawi se Vise-President Michael Usi, getuig van die diepgaande impak wat die CCAP oor die afgelope eeu gehad het.
Met bykans vier miljoen lede in Malawi alleen, het die CCAP ’n magtige stem geword in die bevordering van sosiale en ekonomiese ontwikkeling. President Chakwera het verder die CCAP se bydraes tot opvoeding, gesondheid en ekonomiese vooruitgang beklemtoon en gesê: “Julle toewyding aan die verkondiging van die evangelie en die opheffing van lewens is prysenswaardig.”
Michael Usi, Vise-President van Malawi
Die geleentheid het ook die internasionale bande van die CCAP gevier. Marius Nel, een van die afgevaardigdes van die Sinode van Wes-Kaapland, het in sy toespraak die leierskap van die CCAP uitgesonder, wat sentraal was in die kerk se groei.
“Dit gee my soveel vreugde om as verteenwoordiger van die NG Kerk in Suid-Afrika in hierdie viering te deel. Die CCAP het ‘n sterk en florerende kerk geword weens die geloof van julle predikante, diakens, ouderlinge en onderwysers wie in hulle alledaagse lewe, alledaagse bedienings, gehoorsaam is aan God.
Die CCAP is nie net geografies geleë in die hart van Afrika nie – die CCAP is die spirituele hart van Afrika! Elke lid van die CCAP wat ons ontmoet, straal ’n liefde, warmte en genot vir die lewe teenoor ons uit wat ons stomslaan. Julle is ’n ware refleksie van die hart van God. Mag julle aanhou om so te wees.”
’n Fees van dankbaarheid
Tydens die viering was daar nie net teruggekyk op wat God in die verlede gedoen het nie, maar daar was ook ’n oorgawe aan die toekoms. Ds. Biswick Nkhoma, Moderator van die CCAP Algemene Sinode, het die kerk se rol in die bevordering van Malawi se sosio-ekonomiese landskap uitgelig en die mense aangemoedig om voort te bou op die fondamente wat die vroeëre geslagte gelê het.
“Dit was ’n wonderlike geleentheid om deel te wees van hierdie eeufeesviering,” getuig Daniël de Wet, Taakspanbestuurder: Afrika Ekumene. “Die eeufeesviering was nie net ’n mylpaal nie, maar ’n hernude belofte om die kerk se nalatenskap van geloof, diens en ontwikkeling voort te sit. Die CCAP se eeufees herinner ons aan die volgehoue impak van geloofsgedrewe gemeenskapswerk en die belangrikheid van eenheid en toewyding in die bevordering van samelewingsontwikkeling.”
Van links na regs: Vasco Kachipapa, Algemene Sekretaris CCAP Nkhoma sinode, Daniel de Wet, PSD: Afrika Ekumen, Cosmas Pamaso, Moderator CCAP Harare sinode, Marius Nel, Assessor.
Boekbekendstelling: ’n Historiese bydrae
Die feesvieringe is verder verryk deur die bekendstelling van die boek “The Church of Central Africa Presbyterian 1924-2024. A Centenary Assessment” op Vrydag, 23 Augustus. Hierdie werk is nie net ’n historiese dokument nie, maar ’n teologiese refleksie oor ’n eeu van geloof, diens en die dieper betekenis van die CCAP se impak op die gemeenskappe waarin dit dien. Daniël de Wet, wat die bekendstelling bygewoon het, het dit beskryf as “’n ryk tapisserie verweef met die drade van historiese narratief, kritiese analise en teologiese insig.”
Hierdie boek, wat bestaan uit verskeie artikels, is in drie afdelings gestruktureer. Dit bied nie net insig in die verlede van die CCAP nie, maar roep die leser op om te besin oor die toekoms. “Die akademiese kwaliteit van die boek, tesame met sy insiggewende kritiek, maak dit noodsaaklik vir die verstaan van die dinamiese en dikwels komplekse interaksie tussen geloof en samelewingsverandering in Suider-Afrika,” sê Daniël.
’n Toekoms van hoop en vreugde
Die eeufees is egter meer as net ’n terugblik. Dit is ’n hernuwing van die belofte wat die kerk gemaak het om voort te gaan met hulle werk, om voort te bou op hul ryk erfenis en om steeds die Here te dien in ’n veranderende wêreld. Die CCAP gaan die volgende eeu tegemoet met die verwagting dat die Here groot dinge in en deur hulle sal vermag.
Die woorde van ds. Humphreys Zgambo, wat die feesgangers aangespoor het om die nederigheid, geloof en eenheid van die vroeë sendelinge na te volg, eggo steeds: “Mag ons die Here bly dien met die ywer en toewyding van ons voorgangers en mag ons getuig van sy genade in alles wat ons doen.”